Midweek 5 Mei 2021

Hierdie week se boodskap

Tema: Geloof

Teks: Num. 13-14

Wat jy glo verander alles. Ongeloof is beperkend op jou lewe. Dit steel van jou. Geloof maak weer die onmoontlike moontlik. Geloof maak die wonderlike wat God deur Jesus vir jou voorberei het, moontlik. Jy word van so baie beroof as gevolg van jou ongeloof, twyfel of verkeerde ingesteldheid.

Jy is geroep om meer te wees as wat jy tans is. God het ‘n roeping oor jou lewe. Jy is ‘n oorwinnaar. Jy is nie bestem om geestelik arm en uitgeteer te wees nie. Geloof sluit ‘n nuwe lewe oop.

Mens sou dink dat die Israeliete nie kon wag om die beloofde land binne te gaan nie. Vanuit Numeri 13-14 sien ons nadat Moses die 12 manne gestuur het om ondersoek in te stel en hulle terugkom, hulle verslag nie dieselfde is nie. Tien van die manne gee ‘n negatiewe verslag. Hulle is bang. Hulle sien net die slaggate raak en nie die geleenthede nie. Hulle beskou hulself as sprinkane in hul eie oë en in die oë van die vyand. Hulle ongeloof veroorsaak dat hulle die res van die volk ook negatief beïnvloed. Hulle invloed is so groot dat die volk glad nie wil hoor wat Josua en Kaleb vanuit ‘n geloofsperspektief sê nie. Inteendeel, hulle wil die twee manne doodmaak. Dis dan dat God self ingryp en Sy hartseer uitspreek omdat die volk nie Sy almag sien en nie op Hom vertrou nie. Die uiteinde is dat die Here hulle laat swerf in die woestyn as gevolg van hulle ongeloof.

God vra van ons geloof in hierdie uitdagende tye. Geloof in Hom en Hom alleen. Ons moet nie staatmaak op ons eie vermoëns nie, maar God ten volle te vertrou in alle aspekte van ons lewe. Soms kan jy voel dat daar nie uitkoms is nie, maar onthou wat Matteus 19:26 sê: Vir mense is dit onmoontlik, maar vir God is alles moontlik”. Lees gerus Numeri 13-14 en luister na die boodskap ten einde die volledige prentjie van geloof en ongeloof te ervaar.