Midweek 03 Augustus 2022

Hierdie week se boodskap

Tema: Lewe

Boodskap: 

Jy moes sekerlik ook al nagedink het oor die lewe. Wat is die sin van lewe? Hoe kan ek voluit lewe? Dalk het jy al nagedink oor wat is ware lewe. In Afrikaans het ons eintlik net een woord en dit is “Lewe”, maar in die Grieks is daar 3 woorde vir “Lewe” naamlik, bios, psuge en zoe.

Dit is baie belangrik as jy jou Bybel lees om die verskil tussen hierdie drie betekenisse van lewe te kan onderskei. Dit is egter nie so maklik as jy net met jou Afrikaanse vertaling werk nie. Vir Jesus was dit belangrik dat die mense die ware lewe, die “zoe-lewe” ontdek, maar vir dit om te gebeur is dit nodig dat jy eers in jouself sal sterf. Vir die sterf in jouself, die afsterf van die eie-ek gebruik die Bybel die woord “psuge-lewe”. Jesus sê dat Hy die ware “zoe-lewe” in Hom het en deur my eie ek af te sterf, die “psuge-lewe”, vind ek die ware lewe (zoe-lewe). Die lewe wat sin maak. Ek nooi jou uit om na die boodskap op You-Tube te kyk sodat jy hierdie lewensveranderende boodskap in diepte sal verstaan. Jesus sê nie verniet Hy is die lewende water en die brood van die lewe nie. Hy sê voorts dat Hy die weg en die waarheid en die lewe is.   

Vrae om oor na te dink:
Kyk eers weer na die boodskap en dink dan na oor die volgende
1. Wat is volgens jou ware lewe?
2. Wat is vir jou belangrik in die lewe?
3. Hoe dink jy sien Jesus die lewe?
4. Hoekom sukkel mense om die “eie-ek” af te sterf?
5. Die volgende tekste is belangrik vir hierdie tema van lewe
a. Gen. 1:26 – Sien raak hoe God die mens skep as verteenwoordiger, volledig na Sy beeld (Dit sluit bios, psuge en zoe-lewe in)
b. Gen. 3 – die mens verloor die zoe-lewe as gevolg van sonde
c. Gen 5:1, 3 – Die mens wat gebore word sonder die zoe-lewe en die zoe-lewe is dan te vind in Jesus Christus
d. Matt 16:24-24 – In die teks wys dit dat jou psuge-lewe moet sterf
e. Joh 10:17-18 – Jesus verwag van ons om ons psuge lewe af te sterf en Hy doen dit self ook
f. Joh 3:16 – Hier word lewe vertaal met die zoe-lewe
g. Joh 10:10 – Hier word lewe ook vertaal met zoe-lewe
h. Joh 1:4-5 – Die zoe-lewe is in Jesus

Vir volledige videoboodskap, klik hier https://www.youtube.com/watch?v=wJCtogcfbuw

 

Knie-aksie

Bid asb vir lidmate wat ongesteld is, herstel na operasies of tans in die hospitaal is: 

 

Homer Neethling 
Elsie Van Der Merwe
Frank Ehmke 
Japie Olivier

Johvan De Lange

Bid asb ook vir lidmate wat siek is. 

Program vir die week

Amrie Els se lewenskets (kategeet)

Amrie bly al ses-en-dertig jaar in Nelspruit.

Sy is ‘n verkoopsbestuurder by Steel Brothers. Sy het een suster wat in Bloemfontein woon asook een wonderlike seun, Aiden. Hulle het ‘n Franse bulhond naamlik, Milo, en Aiden het ‘n Pikanese naamlik Peanut.

Amrie is mal oor perdry – dit was vir sestien jaar haar sportsoort. Sy is ook baie lief vir swem en netbal.

Dit is vir Amrie so ‘n voorreg om die mamma te kan wees van so ‘n mooi Jesus-kind wat haar elke dag van teruggee en vergifnis leer. Sy sien die Heilige Gees uit haar seun straal. Hy het al so ‘n verskil in soveel mense se lewens gemaak. Sy is so trots op hom as die onderwysers by sy skool haar kontak en dankie sê dat sy hom grootmaak in die Here se naam, want hulle sien dit in hom.

Amrie getuig: “Ek sien elke liewe dag van my lewe hoe die Here vir en met ons werk. Die dankbaarheid wat ek vir Hom het, is onbeskryflik. Daar is tye wat ek bekommerd is oor finansies, oor werk en oor Aiden se gemoedstoestand. Maar dan is daar elke liewe keer rustigheid asook voorsiening gemaak sonder dat ek eers regtig moet vra. Ek weet die Here lewe in ons huis en in my en Aiden se harte; Hy weet en sien ALLES. Dit is die lekkerste gevoel om te weet ek kan alles aan Hom oorgee en Hy sal dit hanteer. Ek glo in my hart die Here het een van sy engele gekies om aan my te gee in die vorm van Aiden, want daardie kind het Christus geheel en al in hom.”

“Die vorige naweek is aan hom gevra vir wie hy swem. Die afrigter het verwag Aiden gaan sê: ‘Vir myself,’ maar sy antwoord was: ‘Coach, ek swem net vir JESUS.’ Dieselfde naweek het hy twee rekords met sy swem opgestel.”

Die Vleisfees benodig nog lidmate se hulp en skenkings. Raak betrokke en kom deel in die opgewondenheid van dié feesdag. Merk asb alle inbetalings duidelik as Vleisfees. 

Mag elkeen God se Liefde elke dag ervaar. 

Vriendelike groete,

Jean, Louis en Gerrit