Midweek 27 Julie 2022

Hierdie week se boodskap

estelik toegewy

Teks: Handelinge 16: 16-34

Boodskap:

Die vorige twee jaar het ons allerlei uitdagings gehad, maar die voordeel was dat meeste van ons se programme rustiger was. Hierdie jaar is ons programme egter ewe skielik weer baie vol. Oral het dinge weer terug gekeer na hoe dit was. Dit is weer ‘n uitdaging vir baie mense om te probeer balans handhaaf tussen werk, skool, sport en ander verantwoordelikhede.

Ongelukkig is ons geneig om ons geestelike toegewydheid te begin afskeep wanneer ons programme baie vol raak. Dis baie keer die eerste area van my lewe waaraan ek minder tyd begin spandeer wanneer my program baie vol is en ek sukkel om by alles uit te kom. Maar dis nie hoe dit behoort te wees in ons lewens nie.

In die bekende verhaal van Paulus en Silas in die tronk, sien ons dat hulle toegewyd bly ongeag hulle omstandighede. Hulle laat nie toe dat hulle omstandighede hulle geestelike lewe en toegewydheid bepaal nie. Nee, hulle geestelike toegewydheid bepaal hoe hulle op hulle omstandighede reageer en optree. Dit kan net gebeur omdat hulle erns gemaak het om elke dag tyd in God se teenwoordigheid te spandeer.

Hoe minder tyd ons met God spandeer, hoe meer sukkel ons om ons omstandighede te kan hanteer. ‘n Bose kringloop kan dan onstaan want hoe meer ons sukkel, hoe meer kom ons in die versoeking om minder tyd met God te spandeer om by al die ander goed in ons lewens uit te kom.

Omrede Paulus en Silas nie toe laat dat hulle omstandighede hulle geestelike lewe bepaal nie, kan God hulle as instrumente in Sy hand gebruik. Ja, God kan jou uitdagende omstandighede ook gebruik tot eer van Sy Koningkryk as jy ook, soos Paulus en Silas, nie toelaat dat jou Omstandighede jou verhouding met God bepaal nie.

GEBED:

Here, help my dat my besige program en uitdagende omstandighede nie my geestelike toegewydheid bepaal nie, maar dat my geestelike lewe en toegewydheid my hantering van my besige program en omstandighede bepaal.

Verdere nadenke: